情人節又殺到，一眾「獨」男最怕沾到半滴浪漫氣氛。返公司，總有個中女同事揸住紮紅玫瑰行catwalk騷；走出街，一班癡男怨女卿卿我我，立即無名火起。計我話唔需要匿喺屋企唔出街，情人節一樣有餐你獨食。獨男食要食得激，食辣趁機痛快標次眼水，唔係傷心淚流，係好味到喊啫。
記者：王震遠
攝影：周旭文、伍慶泉
模特兒：Yu、Sam＠PureModel
山葵飯糰2秒即標淚
港女最愛食日本餐，賣相精緻，食物輕盈又多款式。情人節當日，獨男可以選擇殺入日本餐廳，一嘗這種港女最愛滋味。位於佐敦的Yagura，餐廳設有吧枱，就算一人進餐都唔使怕霸晒成張枱咁尷尬，而且日本師傅喺正面前準備食物，可以同師傅交流食物心得，一個人食飯都唔怕悶。想食個「轟烈」的一人餐，日本菜必揀山葵。食過山葵都知，入口細細啖已經足以面紅耳熱，攻鼻感覺真係令人唔使2秒即落下男兒淚。Yagura以山葵作主題，推出了幾款充滿日本風味的山葵菜式，配合不同的日本食材，如和牛、味噌等創作出新口味。想痛痛快快喊一場，又想食特色日本菜，一定要試。
山葵味噌飯糰$58
飯糰搓好，再將用麵豉、甜酒和山葵混成的餡料放進飯糰。入口先食到濃郁的味噌味，隨即滲出山葵的刺激感覺，加上飯糰給火炙過，帶淡淡的米飯焦香。
山葵蛋黃醬配薯仔$58
美國薯仔先蒸15分鐘，伴上蛋黃醬。食用時蘸一些山葵蛋黃醬，令薯仔的味道更濃郁及帶淡淡辣味。
Sam：「薯仔好有薯香，加咗山葵醬之後更加惹味。」
山葵和牛片$498
和牛燒至半生熟，切片後放上洋葱，再加橄欖油、山葵、濃厚豉油。入口充滿橄欖油香和淡淡山葵味，配油份高的和牛，口感變得清爽。
Yu：「山葵嘅鮮辣，更加帶出和牛原有嘅味道。」
山葵茶漬飯$68
將飯和山葵放進碗中，再放進日本湯料和豉油後倒進熱水，加配料上碟。將少許山葵攪拌在湯中，山葵的辣配合濃郁的湯底味，好快食完整碗茶漬飯。
Yagura（27101010）
佐敦彌敦道380號逸東酒店地面
一個人烚吓烚吓
打邊爐通常一大班親朋戚友share一個爐，後來快餐店亦相繼出現細鍋火鍋，但食物選擇始終不夠多。稻香集團開設新品牌HIPOT不久，主打年輕人平價市場，裝修簡潔時尚，一洗客人對打邊爐必定污糟印象。設有醬料吧，客人可自助式調配自家醬料。一個人都可以開爐，而且食住熱辣辣嘅食物，熱到標眼水都無人怪你，又係獨男過情人節嘅心水推介。
紅酒墨魚丸$42
手打墨魚丸，比機打的更彈牙，再將紅酒啫喱放入墨魚丸。煮熟後的紅酒酒心充滿酒香，口感獨特。
一人前火鍋套餐（晚市）$98
十多款食物包括：水餃、鴕鳥肉、五花腩、海蝦等。珊瑚蚌味道新鮮爽口，單食已值回票價。
田園一碗蔬$28
食得肉多，叫碗蔬菜可以平衡吓：雞髀菇、冬菇和白菜等，抵食。
HIPOT（31481313）
觀塘創紀之城5期6層L6-3號舖
傷心酸辣菜
數月前，一間名叫「傷心酸辣粉」的重慶菜小店進駐深水埗，舖面對正高登商場，佔盡地利，高登出名多「毒」男出沒，店名又夠啜核應景。此店專賣麻辣川菜，想流亁眼淚出身汗就啱晒。「傷心」主打酸辣粉，不少人喺深圳東門食過酸辣粉後，再試此店出品，馬上轉軚撐場。主廚容姐係重慶人，在家鄉學得一手好廚藝，為開此店再上重慶學師進修。辣椒配料都由重慶取貨，味道自然正宗。重慶菜比川菜的麻辣，加入酸的元素，用醋來提高酸的感覺，令一班嗜辣者大呼過癮。
酸辣粉$15
番薯和木薯混成粉煮好，再加十多種配料的豬骨酸辣湯底。木薯粉夠彈牙，湯底酸辣並重，令味覺受盡刺激。
口水雞半隻$60一隻$100
將雞放進雞湯浸熟，斬件後加上紅油、花椒粉等配料。紅油很辛辣，配合雞件相當惹味。
傷心酸辣粉（27208222）
深水埗福榮街94號地下