莊思敏前日在中環出席活動時公開大讚男友吳浩康（Deep）是個有誠意的男人，她此言非虛，活動結束後Deep隨傳隨到，火速現身傍實shopping，同場出現的楊愛瑾（Miki）男友欠奉，但有女伴陪揀衫也算聊勝於無。
中環ifc商場是名人明星的shopping朝聖地，前日下午女模莊思敏和楊愛瑾各自逛商場，但前者有即call即到的男友吳浩康陪伴，後者感情暫未有着落，只好搵女伴陪揀衫。
爆男友想結婚
前日莊思敏和陳嘉容在ifc出席公開活動，其間莊思敏提及Deep雖有結婚衝動，但她認為自己年紀尚小，男友又未置業，故未考慮結婚問題，不過她仍稱讚男友是個有誠意的人。冇樓的Deep果然有誠意，莊思敏完成活動後偕陳嘉容一起蹓躂商場時，接女友call的Deep即時蒲頭，四萬咁口匆匆到場會合女友，在旁的陳嘉容也識做不當電燈膽先行離開。
同一時間Miki在商場另一端出現，薄施脂粉的她由一名年紀相若的索女友人陪同往Starbucks買咖啡，但她們在櫃位左顧右盼一輪後卻沒幫襯，還突然轉軚去PATRIZIAPETE睇衫。現場見Miki望住大批春夏新裝勁開心，不時將衣物放在身前照鏡研究，搞了幾分鐘後又是沒斬獲。
行商場如做騷
當時Miki明知在場有大批記者，但她繼續在商場兩頭騰，如做騷一樣任睇任影，之後她又去另一果汁店買飲品，買完後意猶未盡，再殺去連卡佛百貨揀衫，相信是因她要為新片《保持愛你》宣傳，故掃定貨以備扮靚示人。
採訪、攝影：娛樂突發組