仲講倪震「孔雀開屏」？Out喇！估唔到遠在英國嘅曼聯球星基斯坦奴朗拿度（C朗），都同喪啜城大女生張茆嘅震震一樣，轉轉口味，媾18歲大學生！
繼英國電視台姐仔、西班牙富家女、意大利名模、烏克蘭人妻後，英國《太陽報》踢爆C朗插花扭入大學校園，喪媾18歲金髮一年級生！呢位C女郎叫莉芙（Liv、全名OliviaSaunders），就讀於曼徹斯特大學嘅康樂及管理系，住緊周租100鎊（約1,115港元）嘅大學宿舍，同室友們共用廁所、飯廳同乒乓波枱。
揸賓利送女友返宿舍
莉芙平時揸架FordKa（最新款都係7,945鎊），夜晚放學仲去夜店做推銷女郎（同茆茆一樣鍾意去夜店噃！），咁嘅背景，可能喺C朗眼中好有灰姑娘Feel，於是「王子上身」，踩行油衝入校園！
莉芙友人透露，C朗已經約佢出過幾次街，「莉芙好省鏡，C朗睇到眼都唔眨，仲成日互傳SMS解相思之苦。」最近一次C朗約埋莉芙去希爾頓酒店間Cloud23酒吧玩，事後仲揸架15萬鎊賓利送佢返宿舍。咁有型、有錢、有名嘅柴可夫「司機」，試問邊位女士唔即刻跳上車？唯一擔心係C朗手車穩唔穩陣啫！
一身債拒使男人錢
據莉芙友人透露C朗今次絕對執到寶，「C朗雖然有錢有地位，不過可以得到莉芙好幸運，因為佢智慧和美貌並重（係咩？），唔同一般球星嘅女伴咁話。」聽講莉芙仲好獨立，唔鍾意要人哋錢。嘩！C朗以往女友都係有錢有名，如果莉芙真係如上述所言，或者馴服到呢位風流倜儻嘅花花公子噃！
不過，我求大俠上過莉芙個facebook，發現佢嗜好係買嘢、玩、享受人生，點都睇唔出同鍾意名牌手袋嘅茆茆有咩分別。而且佢最新留言係「莉芙需要一份工還清一身嘅透支利息債！」噢！唔通佢當C朗係人肉提款機？不過冇所謂啦！C朗「開屏」梗要付出代價嘅！
