花旗財長前晚公佈挽救銀行嘅計劃冇乜新意，對充滿期望嘅股民嚟講變咗一個壞消息，花旗股市前晚大跌，幾個主要指數都跌超過4巴仙，大銀行閒閒哋跌十幾巴仙，股民對財長嘅計劃投咗「不信任一票」。
花旗股市大插，昨日亞洲股市普遍回落，港股唔見咗341點，不過同低位比較，已經跌少好多，技術走勢唔算太差，如果A股靠穩，將有助港股守住13300關。
紫金C輪14210：紫金（2899）昨收4.85元，升7.5巴仙，金價造好，紫金逆市攀升，睇大形勢，黃金仍係資金避難所，紫金技術走勢向好，有機會上試位處5.70元嘅250日線，可以諗吓隻C輪14210，昨收9.5仙，有效槓桿2.5倍。
正股升上5.70元，14210可見14仙，正股跌穿4.40元就沽咗隻輪止蝕。
俊樺