八方老闆肥佬黎想搞電視台，之前俾人截糊，噚日又有新發展，就係宣佈請咗馬英九心腹金溥聰做壹傳媒台灣電視CEO。香港人唔多認識金溥聰，佢喺台灣卻十分傳奇，事關佢係馬英九最倚重嘅幕僚，曾任台北副市長，馬英九當選總統亦係靠佢。由於佢為人低調，所以被稱為「影舞者」、「佛地魔」，被視為台灣政壇kingmaker。
目標做到叫好又叫座
馬英九當選後，金溥聰表明不入府、不入閣，更離開權力核心嚟香港中文大學做咗半年訪問學者，今次忽然幫肥佬黎籌辦電視台，令人訝異。53歲嘅金溥聰係滿清皇族愛新覺羅後人，本名愛新覺羅．溥聰，係末代皇帝溥儀嘅堂弟，佢透露識咗肥佬黎年多，雙方政治價值符合，互相信任，相信合作有化學作用。
據金溥聰稱，新電視台未有名稱或啓播日期，暫時唔敢奢言賺錢，目標係做一間既叫好又叫座、唔蝕錢又有公信力嘅電視台。佢話新電視台唔會係24小時新聞台，可能有軟性嘅戲劇節目。金溥聰做過記者，又曾任大學新聞系教授，佢話日後只會為新電視台新聞部訂大方向，細節由總監負責，新聞取態會超越黨派、以台灣為座標軸心，象限涵蓋全球。
身為馬英九愛將，金溥聰話早前已通知馬英九會加入壹傳媒，台灣總統府發言人王郁琦話馬英九了解、尊重、祝福金溥聰嘅決定，祝佢順利展開新事業。綠營指金溥聰同馬英九關係密切，搞電視台有角色衝突，質疑回復黨政軍介入傳媒專權年代；金溥聰則強調會堅持專業操守，唔會透過關係攞獨家新聞。
與多間電視台洽談中
有報道指肥佬黎正洽購台灣年代電視，對方開價40億台幣，只要傾妥價錢便可成交，金溥聰稱𠵱家仍未落實購買一個電視台或者頻道；壹傳媒台灣主席葉一堅話，壹傳媒已同台灣多間電視台洽談購買事宜，如果價錢傾唔掂，壹傳媒會自己成立新電視台。肥佬黎則話𠵱家經濟唔好，收購要戒急用忍，新電視台預計今年底明年初啓播，佢又指請金溥聰係因為佢熟悉傳媒運作，而且能力強，政治取向「不藍不綠」，係大台灣、泛台灣人。
mailto:[email protected]