江若琳和JaniceMan（文詠珊）在電影《愛情故事》中，男男女女互咀一通，甚少拍親嘴戲的江若琳，與JaniceMan越咀越開心，並大叫舒服，不過與男角Rex一咀卻大感尷尬，一度要求導演清場拍，最終反被寸要求太誇張。
江若琳、JaniceMan、徐正曦及組合Square成員之一的Rex（何浚尉），早前到天水圍燒烤樂園為電影《愛情故事》宣傳，在戲中江若琳與Rex及JaniceMan分別有親嘴鏡頭。
求清場被寸誇張
江若琳笑說：「我好少拍呢啲戲，覺得有啲尷尬，嗰日同Rex拍場咀戲，我要求導演彭順清場拍，點知導演話我咁誇張，如果要拍床戲我點算好呀？」
江若琳續說：「我同JaniceMan第二次合作拍戲，戲中都有親嘴鏡頭，不過同女仔咀冇咁尷尬，我哋咁熟咀得好舒服。」對於早前傳過她們兩人不和，江若琳強調絕無此事。
睇咀戲會心微笑
JaniceMan除了與江若琳有咀戲外，與徐正曦也有親熱戲，她說：「我同江若琳好有默契，大家冇乜尷尬，因為要演好部戲，其實場戲係講我哋扮kiss整蠱其他人，呢場戲拍得好順利，只係兩take就拍完，我同佢睇番playback時，大家都會心微笑，因為咀得好真實，最緊要係導演收貨。」
JaniceMan又表示稍後會考私家車牌，由於是在實施新例之前報名，故考到車牌不用掛P牌，但她覺得現時的交通法例要加強阻嚇作用，尤其醉駕一定要嚴懲，若考得車牌一定遵守交通法例。
採訪、攝影：魯萍