PS3重頭大作《Killzone2》月尾見街！搶閘試玩，發現中槍都有「三個層次、四個階段、五種演繹方法」！電腦AI個個好似《喜劇之王》尹天仇上身，射火箭炮佢識掉頭走，遇到爆炸又識大字形飛起，諗住呢槍爆佢頭啦，點知淨係射甩佢個頭盔喎；好喇，近距離亂槍掃，佢跪低飛身扮埋個死樣出嚟，再等你鞭屍先肯「真死」！你班死茄喱啡！
文：㩒釘華
石油氣樽都交足戲
PS3獨佔大作《殺戮地帶2》（Killzone2），堪稱同《GOW》齊名嘅第一人稱射擊遊戲。如果再比較畫面或貼圖實唔實淨，又會掀起兩機Fans罵戰！只可以講《Killzone2》光源處理好靚，射氣樽個頭，會漏氣噴火飛起再爆，射樽身就直接爆炸，敵人被射殺有時會飛落欄杆，有時會先跪低俾你鞭屍，只可以講句做得好真實。
做咩要逼我殺人？
今次又有古講喇，因為亞洲版係有中文顯示，所以可以玩得投入啲。《殺戮地帶2》係PS2《殺戮地帶》續篇作，遊戲故事承襲前作，以邁進太空殖民時代嘅未來世界為背景，你就扮演星際戰略聯盟（ISA）成員，繼兩年前在ISA殖民星球維克塔（Vekta）大戰後，今次就深入軍事獨裁國家黑爾蓋斯特（Helghast）嘅根據地，粉碎侵略野心。即係大家都係人類，所以爆頭流血走唔甩，都幾血腥暴力，小朋友要乖乖地眯埋眼。槍械方面，今次重量感同後坐力都做得唔錯，用唔同種類嘅槍都有幾大分別，除掉Grenade外仲可以用槍柄扑人，有排都未玩厭。
天生我才在職培訓
玩FPS重頭戲都係玩網上對戰，支援32人對戰，仲有多達7種兵種揀，包括步兵、工兵、醫護兵、偵察兵、突擊兵、戰術兵同破壞兵。每種兵都有獨特能力，例如工兵可以設置會自動瞄準敵人開火嘅機槍塔，偵察兵就可以用隱形衣隱形，戰術兵仲勁，可以Call架無人駕駛空中攻擊機出嚟支援，無論你係死衝Rambo抑或鬼祟王，總有一個職位啱你做！
Profile
機種：PS3
類型：第一身射擊（FPS）
人數：1
開發：GuerrillaGames
語言：中英文合版
發售日期：2月24日
