星期六就係情人節，雖然話金融海嘯，但都要同有情人浪漫度過。華華噚日收到聖雅各福群會一封邀請函，話佢哋旗下首間扶貧中心會喺浪漫嘅情人節正式成立。本來呢啲活動冇乜特別，但吸引華華嘅係，呢個扶貧中心由東亞銀行（023）撥款贊助，主席寶哥哥李國寶嗰日會出席個中心嘅開幕典禮，聖雅各福群會執行委員會副主席梁啓雄亦會同場出現。
自從道瓊斯內幕交易案後，寶哥哥同梁啓雄都好少公開一齊出現，就算一齊出席，都會保持零交流！不過，寶哥哥舊年年頭同美國證監會達成和解協議，仲畀咗810萬美金做和解費，事件終於告一段落。華華相信，佢哋嘅友情，絕對唔會俾呢啲小事影響到。
今次兩個好朋友喺情人節同場出現，或者會多番啲交流，唔知會唔會深情對望呢呵！