煲呔押後政改諮詢，好多人認為林D9應該停薪半年，幫納稅人慳錢，庫房每月最少節省30幾萬元，但佢死撐自己工作纏身，究竟佢忙乜呢？八方噚日知道答案，就係向京官「解畫」。
話說有個「中國國粹油畫藝術精品展」，中聯辦主任高祀仁、副主任黎桂康等西環要人空群而出，八方見到林D9都在場，仲全程傍住高祀仁欣賞油畫，其間指手劃腳介紹觀畫心得，一時指作品有modernart手法，又點評有幅畫油彩好厚，十足油畫專家。高祀仁聽佢解畫聽得龍顏大悅，兩人不時咬耳仔，似乎好好傾。係人都知西環係權力核心，港官成日要去解畫，林D9噚日表現落力，工多藝熟之故也。