正所謂「人怕出名豬怕肥」，呢句說話真係好有道理㗎！公眾人物嘅一言一行都受世人關注，華華相信，中金公司首席經濟學家哈繼銘博士對呢樣嘢應該有深刻體會。
中金高層俾趕出場？
最近有傳，哈博士喺大陸參加某大型基金公司嘅路演時，因為同在場人士觀點分歧，繼而發生激烈爭議，但大家放心，佢哋絕對冇動武，只係哈博士俾人喝令離開。
有人認為起因係同佢近期睇淡中國經濟有關喎，不過哈博士話晒都係首席經濟師，俾人趕出場咁大件事，中金梗係要回應吓。《每日經濟新聞》引述中金發言人話，意見分歧，爭論吓好正常，但哈博士冇參加過任何活動喎！
華華噚日打電話問哈博士，佢話以往參加呢啲活動嘅氣氛都好融洽，但春節後就冇去過基金路演，傳聞簡直係無中生有。哈博士今次無妄之災，惟有安慰自己樹大招風啦！