金融海嘯下，香港有錢佬身家大縮水，消費力唔見一大截，即時被名店嘅白鴿眼售貨員睇低。畢馬威合夥人王尹巧儀噚日同華華講，𠵱家去高級餐廳，周圍嘅人都係講普通話。
講廣東話 名店受辱
佢仲話有個女性朋友，最近去一間名店買嘢，點知當佢用廣東話問店員，對方竟然即時回應：「PromotionCounter（特價攤）喺嗰邊！」原來地道港人喺佢哋心目中，只會執平貨。
點樣可以幫香港度過難關，王太認為，裁員條橋唔要得，因為只會令消費同經濟越嚟越差，最好就係透過減薪共度時艱，仲要政府嘅公務員都一齊全社會參與先公平。至於退稅佢就唔多贊同，因為呢筆錢最終只會流入銀行體系，對經濟幫助唔大，而且只有畀得起稅嘅打工人士受惠。佢又唔贊成減稅率或提高稅階呢啲大動作，因為穩定嘅稅務政策對吸引外資至為重要。
王太嘅觀點，顯然同另一四大會計師行德勤合夥人羅盛慕蘭好大出入。羅太建議向納稅人大幅退稅75%，同時減稅率同提高稅階，又認為稅率可以每年檢討。
減唔減稅 會計師分歧
不過兩位阿太有個共通點，就係大幅縮減08至09年度財赤嘅預測，市場之前預期本年度財赤500至800億元，德勤最新修訂係有盈餘100億，畢馬威就估財赤276億，因為企業舊年第四季嘅虧損，仲未反映喺稅項上，變相喺08至09年度交貴咗稅。
李華華
mailto:[email protected]