Odyssey，字面解長途漂泊、冒險之旅，Honda為其七人車取呢個名，已擺明車馬，將大長途舒適度列為首要考慮，而所謂冒險，其實係低車身低重心、有跑格風範嘅操控。新車３個月前已搶閘抵港，匆匆一遇，未能試其真章，今日索性同CarPro借多一次Odyssey，深入啲體驗吓其操控同乘坐感，睇吓到底有幾Odyssey。
記者：徐影龍
攝影：譚盈傑
Model：Phoebe@StageModels
睇相都無咁覺，見到真車後，好多人第一反應係，乜咁有型？今次借架白色OdysseyAbsolute，車頭鬼面罩及頭燈輪廓位更為凸出，炭灰色電鍍襯出黑白分明感，立立令好鬼有型靚仔，加上Honda特意設計扁平化嘅油缸同尾喉鼓，令底盤得以降低，整體感覺似一架拉長咗嘅房車，而非老成持重嘅七人車款，充滿剛陽跑味，令到血氣方剛嘅我，急不及待上車撻匙走番轉。
由市區出發，停停開開，仍未Feel到有乜特別，上東廊後開始發力，轉數飆升速度已有驚喜，唔好話同牛龜七人車比，就算同番Civic比都唔輸蝕，即使欠缺CVT無段波箱，上落波段一樣順暢瀟灑，轉波都即時上番三、四千轉，喺暢通大直路間，跑得好爽好開心，渾然不覺揸緊七人車！跑完一輪，轉玩山路，由百福道燈位0km起步，又係輕踩油門已扯高轉數，跑又長又斜嘅百福道都好輕鬆，掂住油門直指寶馬山賽西湖，由於彎多又不時遇到慢車，喺斜路上停吓走吓，其實對Odyssey考驗好大，不過Honda係扭力上下咗唔少功夫，耐力相當驚人，故意狠踩油門，居然帶點推背感，七人車玩到咁，夫復何求呀。
打通前後視野
扮完司機，回程時轉為扮吓乘客；我綽號長腿叔叔，每次試親縮細咗嘅七人車，基本上都預咗頂腳，今次我坐最闊落嘅中排，只係稍為頂住膝頭哥，已經好難得，後排唔試都知我要玩瑜伽先坐得入，但要讚佢中排個推前幅度，讓後排乘客上落得輕鬆容易，最正係全車頭枕設計唔會太大，唔單止司機易於觀察後方來車，就算坐後排嘅乘客，向前望嘅視野都唔怕俾前面頭枕及人頭擋住晒，居然仲望到七成擋風玻璃，Honda連尾排乘客個感受都照顧埋，幾細心吖。
坐得舒服，手痕試埋其他豪華享受，Absolute貴為Odyssey頂級旗艦型號，內櫳由真皮加絲絨互襯，貴氣又舒服，最好玩係中控台，日本仔將所有多媒體裝置擺晒落去，DVD、CD呢啲唔使講，中控台下方更內藏一個60GB硬碟，夠你擺1.5萬首MP3落去，到下一代Odyssey推出時都未必聽得晒！中間手枕位亦暗藏USB及AV接頭，高興起嚟，駁完iPod聽歌，再駁PS3打機都仲得。
1.駕駛艙好有層次感，軚環及腳踏跑味滿瀉。
2.後排坐兩個人，一樣有手枕位同杯架。
3.雖然水貨部份按鈕為日文，不過一睇就明。
4.從車尾望向前，居然睇到近七成擋風玻璃，坐後排不再似被人孤立咁慘。
5.前排採半桶椅設計，仲唔係預你手痕劈車？
引擎：2,354c.c.直四
馬力：206ps/7,000rpm
扭力：23.7kgm/4,300rpm
傳動：五前速半自動波，前驅
售價：$368,000
查詢：CarPro（21111103）