最近香港警方就嚴打司機酒後駕駛，車路士嘅班主阿巴莫域治好唔好佢家鄉名酒伏特加就唔知，但佢控制自己名下嘅車路士，就好似人哋醉酒駕駛咁亂咁嚟，巴西領隊史高拉利又成為新犧牲品。
大菲擸分手費夠養老
車仔周一公佈辭退「大菲」史高拉利，暫時由副領隊韋健士帶隊；「大菲」亦係阿巴03年入主車仔後，第4位被炒嘅領隊。據英國《太陽報》報道，阿巴想向「大菲」開刀之前已經有迹可尋，作客被利物浦搞掂後，之前連史丹福橋球場都唔多出現嘅阿巴，竟然多次喺車仔訓練基地出現，仲拉埋愛將杜奧巴同施治密斟，球會中人已經知有大事發生。以杜奧巴今季慘遭安歷卡搶走正選位，呢次唔趁機向「大菲」落藥就有鬼嘞！
金融海嘯席捲全球，阿巴風光不再；據報海嘯冲走咗佢30億鎊（約345億港元）身家，現時財產得番87億鎊，係唔係咁誇就未知，但肯定如果車仔英超前4不保，來季會損失5,000萬鎊收入，阿巴唔牙痛咁聲就假。所以當車仔主場被侯城迫和跌至第4位後，阿巴終於要搵「大菲」開刀；好彩「大菲」都收番750萬鎊（約8,600萬港元）賠償，對佢嚟講都算唔錯嘅退休金。
獲俄羅斯足總放行
「大菲」執教半季就被炒，好多人都為佢抱不平，巴西教練鄧加就話車仔根本冇畀足夠時間佢，曼聯領隊費Sir又用震驚嚟形容。不過點都好，阿巴都要搵人接手教波，唔通真係自己落場帶隊咩，不過候選人中前國米教練文仙尼，同韋斯咸領隊蘇拿就表明冇興趣。
反而現任俄羅斯教練軒迪克，睇嚟都好快成為車仔新領隊；事關據路透社報道，俄羅斯足總已經喺周二宣佈，批准軒迪克教車仔至季尾，仲話同時教兩隊波唔係大問題喎！聽講軒迪克可能以短約形式加盟，而車仔嗰邊亦都承認咗同軒迪克接洽緊，講到米已成炊咁濟。
新任車路士領隊賠率
軒迪克：4倍
列卡特：4.5倍
格蘭：4.5倍
艾歷臣：9倍
蘇拿：11倍
文仙尼：13倍
（只列部份）
賠率來源：sportingbet.com