光怪陸離嘅娛樂圈有勁到爆嘅分豬肉頒獎禮，越來越向錢看嘅社福界亦然。社聯噚日頒發表揚良心企業嘅「商界展關懷」獎狀，總共有1,604間公司得獎，當中包括多間近期裁員、減薪嘅大公司，連賣迷債害到無數散戶輸身家嘅銀行都有份獲表揚，真係諷刺。曾發表「奸商論」嘅商務及經濟發展局局長劉吳惠蘭，果然有見地。
六項準則衡量良心企業
噚日大會由財爺鬍鬚曾頒獎，佢呼籲企業要履行社會責任，唔好輕言裁員，唔知佢頒獎時使唔使揞住良心。社聯有六個準則衡量公司係咪良心企業，個別公司只要符合最少兩項條件就獲獎，六個準則分別係關心員工家庭、鼓勵義務工作、聘用弱勢社群、推動環保、傳授知識技術同樂於捐助社群。
呢啲標準，看在打工仔眼裏相信感慨良多。大裁員嘅滙豐、電盈，都算關心員工家庭？一味減薪嘅大企業，最想員工唔收錢做義工㖭；賣有毒金融產品嘅銀行，有冇傳授足夠知識畀員工呢？用賤招搵錢嘅公司，捨得捐錢唔通就可以抵銷惡行？
冇證據銀行違規獎照頒
政黨、工會對無良僱主獲獎睇唔過眼，噚日去頒獎禮場外抗議，社聯行政總裁方敏生解釋，頒獎畀呢千幾間公司，係要表揚佢哋行出協助弱勢社群第一步，佢希望呢啲公司可以行多步，盡量保障員工飯碗。
至於賣迷債銀行、證券行都獲獎，佢話諮詢法律意見後，認為未證實佢哋違規，加上部份苦主已獲賠償，可見銀行、證券行都係有良心嘅公司，所以照樣頒獎，若日後證實有公司違規，會立即除名云云。
其實質疑商界展關懷濫發獎項非始於今日，八方聽聞社聯內部同埋社工界，幾年前已有異議聲音。有社工同八方講，當年有纖體公司獲獎，然而呢啲纖體公司鼓吹嘅瘦身觀念好唔健康，甚至有公司被指用禁藥幫人減肥，又亂屈客人購買減肥療程，但由於社聯不理營商手法，所以呢啲公司只要「樂於捐助社群」，都可獲嘉許，商界展關懷標誌淪為奸商省招牌道具，社福機構獲得捐款，幫人塗脂抹粉，算唔算助紂為虐？
mailto:[email protected]