近日娛樂圈掀起「誰是鹹豬手」的話題，日前官恩娜（Ella）爆料指出埠拍劇期間，有男藝員喝醉後對女藝員上下其手，令多名男女藝員被扯入風波，事後Ella要發聲明道歉兼潛水避鋒頭。雖然Ella知衰認錯，但曾與她傳不和的陳鍵鋒前晚暗寸她是聰明女仔，似乎指她懂得把握時機博宣傳，一向多言的袁彌明也加把嘴踩Ella講得太多。
苑瓊丹早前在電台大爆有男藝員喜以魔術冧女，專向女藝人抽水，一時間令「誰是鹹豬手」的話題熱爆娛樂圈，官恩娜（Ella）日前出席公開活動時，也向傳媒爆料指早年為無綫出埠拍劇時，有一名已婚男藝員喝醉後向女藝員上下其手，因Ella拍過的劇集中只有《酒店風雲》需出埠拍攝，令該劇不少男女藝員被捲入是非，事後Ella被狂轟博宣傳，要發聲明向被拖落水的男藝員道歉。
籲當事人尋求協助
曾與Ella合拍無綫劇集《律政新人王》兼傳不和的陳鍵鋒，前晚在金鐘出席電器品牌舉辦的頒獎禮，有記者笑指其敵人多嘴講錯說話時，陳鍵鋒即說：「我冇敵人，佢（Ella）係好聰明嘅女仔，好識處理自己嘅事，睇完呢單新聞我都好surprise（驚訝），佢係唔係博宣傳我就唔評論，有時犯錯同講錯嘢係人都有，下次小心處理。我覺得當事人最好尋求協助，始終第一身，有冇被侵犯大家都唔知，可能玩同埋當時情況大家都唔知。但係我係宅男，好少有人同我訴苦傾心事，我又唔八，所以唔知咁多。」
另一方面，袁彌明前晚到九龍灣接受網上電台訪問時，也就鹹豬手事件發表偉論，表示不滿受害女藝員不肯站出來，她說：「嗰啲鵪鶉女藝人當時俾人抽水唔敢講就算，背後就講畀啲三姑六婆聽，害咗好多男藝人，樂小姐（無綫高層樂易玲）都叫佢哋可以講，但佢哋又唔講。」
「喺TVB慣咗被人屈」
袁彌明續說：「呢啲就係TVB文化，女藝人唔識爭取權利，而且喺TVB慣咗被人屈同欺壓都唔出聲，習慣啞忍。不過我信有鹹豬手，尤其係嗰啲楚楚可憐唔出聲嘅女仔就係高危。」不過袁彌明也直指Ella不是受害者不應該多言，又謂Ella今次是衰多事。
此外，鄭嘉穎和胡定欣前晚也有到金鐘出席頒獎禮活動，鄭嘉穎力撐有份拍《酒店風雲》兼被捲入事件的郭政鴻，指今次事件是以訛傳訛，又謂他平日演繹親熱戲份前，一定先與女對手溝通清楚，避免有任何誤會。
採訪：卓寶花、林惠卿
攝影：陳俊強