最近睇《華爾街日報》一篇文章，提到喺加州有位女士，佢老公因為身處嘅行業正走下坡，所以屢次失業，薪水不斷縮水，最近一次減薪，對佢造成好大打擊，決定轉行，但佢唔係去接受再培訓或者做啲乜裝備自己，只係睇坊間嗰啲職業指南，然後發白日夢等運到。另外有對夫婦，老公對份工好厭倦，好想早啲退休，但又未夠錢上岸，結果日日呻，佢太太就日日愁。
只為搵錢時日難過
對於好多打工仔嚟講，返工只係為搵錢，對份工冇感情，經濟環境差，打開報紙唔係減薪就係裁員新聞，咪話唔大壓力，如果身邊另一半突然話對工作厭倦，唔想返工，點算好？
其實能夠搵到一份喜歡嘅工作，好重要，喺工作中搵到樂趣，自然會投入，唔記得當中嘅辛苦，但呢個係好理想嘅情況，大部份人只係單純當份工係搵錢維持生活嘅渠道，可以嘅話都盡量遠離，所以好多人成日諗住放假休息，逃避返工。
敏妮好實際，返工當然為生活，但未至認為工作單一功能係搵錢，當中仲有好多趣味俾敏妮去發掘。講番如果另一半唔想返工，但經濟上又唔容許佢唔做，應該點？敏妮認為如果冇嘢做嘅就應該立即重投職場，講過好多次，經濟獨立好重要，因為另一半隨時有日唔再返工，等到嗰時先搵工，情況可能好危。
積極面對發掘樂趣
當然太太出嚟搵工，會唔會縱容老公更加唔願打工搵錢係要考慮嘅事，所以要畀另一半知，太太重投職場，係畀大家有個走盞位，如果另一半真係想搵過份工，都唔怕收入有真空期。其實做人最緊要有目標，定咗個目標你會千方百計去達成，咁就會有較大動力工作。另一樣敏妮認為好緊要係，唔好用個「捱」字去形容，試吓享受工作，未必搵唔到樂趣。
溫敏妮
http://wanmanli.com/blogs/