一位老讀者自言年屆古稀，寫了三頁原稿紙寄予左丁山，由《蘋果》名采版代轉。老讀者云自遠東交易所年代，已買賣股票，鍾情於「電話公司」，之後並分三次購入電盈，平均價為十七元七角，與私有化價格比較，老讀者云：「以葫蘆打狗，得番條柄！」並以七言律詩一訴衷情，詩云：
「望夫石上望鄉台，
猶盼盈科否極來，
白髮蒼頭來日短，
黃泉路近避塵埃；
人間兒女皆尤物，
私有迴籠只奈財，
股海滄桑原夢幻，
深宵醒覺已無哀。」
這位老讀者，可謂睇得開之至，十分豁達，雖已七十歲，應該仲有排快樂逍遙，到黃泉路係十分遙遠之事，除非去福建泉州旅行，坐車由「泉廈路」去廈門啦！投資股票之事，有得有失，左丁山啲銀行界保險界老友持有「美國銀行」、AIG股票者，人數不少，近日見AIG股價跌至一美元左右，可能隨時除牌，心都實晒。陰功，佢哋其中有啲以每股八十美元買番嚟等退休㗎！又有啲等到AIG跌到四十美元一股先至買入嘅，佢哋現在都唔知幾想有人以每股四個半美元嚟私有化AIG！人比人，比死人，股比股，亦比死人。如老讀者云：「深宵醒覺已無哀」，做AIG小股東慘過做電訊盈科股東，AIG股東應該學習此心境。星期日《明報》刊登一稿，有人移民加拿大，講到嗰邊對投資者保障唔知幾好，香港樣樣不如咁講，呢位作者唔知有冇買過「北電」嘅股票呢？電盈私有化一事，已經變成政治化，言語暴力化，人身攻擊，謾罵之詞四起，而且批評者昧於事實恐怕連電盈嘅通告都未睇過，實在得人驚。DavidWebb喺二月一日自認持有電盈十股，分拆為五個註冊股東，每個持有兩股，所以佢以人頭投票時，控制咗五票。呢位仁兄絕頂聰明，持有十股電盈就揸住五票，非種票為何？但又合法喎。如果一個基金持五十萬股得一票，投票時如以人頭計，就會輸實，幾荒謬呢！