劍橋學生向溫家寶總理掟鞋，成為近日倫敦中國留學生圈子熱烈討論話題。牛津校監肥彭星期一同百多個牛津中國學生見面，肥彭曾被鬧係「千古罪人」，知中國人唔好惹，對中學留學生特別客氣，有與會者話畀八方聽，肥彭向學生講：「千祈唔好用鞋掟我！」
抗議得 動粗唔得
劍橋校長理查德因為學生向溫總掟鞋，搞到要向中國駐英大使道歉，有學生問肥彭，如果鞋係牛津學生掟，肥彭會否道歉？定係企硬維護學生言論自由？肥彭似乎唔係好欣賞掟鞋，指雖然言論自由係大學核心價值，但唔使做掟鞋咁失禮行為（discourteousact），佢話如果呢件事喺牛津發生，肯定令佢好尷尬。
中國人話君子動口不動手，肥彭對此好認同，佢指大學生示威好平常，當年達賴喇嘛訪問牛津，好多中國學生激烈抗議，最近以色列總統佩雷斯去到牛津，演講時亦俾人鬧到七彩，但都冇人動粗，佢顯然認為呢啲表達方式比較恰當。