樸茨茅夫炒完領隊阿當斯唔夠半日，就輪到車仔炒咗史高拉利，但車仔咁做真係搵佢哋嚟搞。樸茅本身唔係乜嘢大球會，號召力經已冇乜，𠵱家仲衰到喺英超要打護級戰，所以想搵個似樣啲嘅領隊嚟教，本身經已唔容易；家陣仲有車仔同佢哋爭，啲名牌教頭好似係軒迪克、安察洛堤同列卡特等，佢哋可以完全唔使諗。嗰班級數低啲嘅教頭好似係古比士利、格蘭同艾歷臣，反而仲有啲機。我求大俠就收到風，佢哋諗住搵𠵱家喺墨西哥教到就被炒嘅艾歷臣。艾歷臣料就麻麻，不過勝在喺英格蘭國家隊同曼城打滾過，又同樸茅主力占士同埋蘇甘保熟，真係理想人選。