內地IT企業教父柳傳志為咗「命根」聯想集團（992）復出，做非執行主席，成效係點，仲有待時間驗證，但金融海嘯再次引起坊間質疑，聯想係唔係行錯國際戰略呢一步棋？
宏願做百年老店
內地《第一財經日報》訪問咗柳傳志，佢老人家堅持，無悔「走出去」併購美國IBM嘅個人電腦業務，之不過，佢話融合過程係要交學費嘅，一來有語言問題；二來條路行嚟跌跌撞撞，營業額起起伏伏，仍未達標，「本來要五個饅頭才能飽，現在吃了兩、三個饅頭，可能快到了第四個」，睇嚟，集團仲有一段時間至飽，但起碼已經睇到聯想有食飽（營業額達標）嘅希望。
柳傳志又講到，以前聯想都曾經遇到呢啲大風浪，甚至係沒頂之災，但佢有信心憑經驗帶領聯想走出今次困境，邁向偉大嘅國際化公司。
乜嘢為之「偉大」？就係壽命要長過百歲，仲要對社會有更大影響力同埋財務回報。嘩！屈指一算，聯想𠵱家得嗰25歲，真係前路遙遙……
開會、專訪冇時停
食飽先可以瞓，聯想仲未食飽，柳傳志又點會有覺好瞓。
話說集團上個禮拜四宣佈管理層大執位，同日下晝3點仲公佈第三季度業績，柳傳志嗰陣身在紐約，已經係凌晨一兩點鐘，唔單止要主持電話業績記者會，又要接受國內外傳媒個別訪問，之後仲馬不停蹄同集團董事開會，搞到成晚冇瞓覺。
後生仔捱一晚半晚無所謂，但對於行年快將65歲嘅柳傳志嚟講，都咪話唔辛苦。華華希望佢保重身體啦。
李華華
mailto:[email protected]