以為經濟唔好，做保險嘅生意會少咗，華華噚日同美國萬通亞洲幾位高層傾偈，總裁余煜榮（Kenneth）話，𠵱家投資相連產品冇咁易sell，雖然上年都有增幅，但差咗啲，得10%左右；反而健康保障嘅產品需求大咗，有近兩成升幅。佢話上年生意冇乜點跌，新造保費收入有7.4億港銀，其中個人壽險佔86%，有6.4億銀。
Kenneth仲話，以往經濟危機時，好似97金融風暴同03沙士，總保費都有16%增長，今次08年就冇乜增長。咁講法，係咪即係今次海嘯嘅威力勁啲呢？不過Kenneth就覺得，最差係上年尾嗰兩三個月，但內部員工08年度依然有個半月花紅，又啱啱加咗人工（平均3%多啲）；而今年會針對需求，主力賣健康保障產品，所以唔會太悲觀喎。佢仲話，今年銷售團隊目標係由1800人增至2500人，最好吸納到金融從業員嘅人才啦。