先喺度恭喜戰友畢傑兄先，周日馬拉加主場對艾美利亞，落後兩球劣勢下反勝3:2，大手扑中主W，終於為本欄牛年首次有進賬，真係值得燒炮仗慶祝。既然個勢返嚟，今次再追有紅人領軍嘅愛爾蘭，主場可勝格魯吉亞兩球或以上，開出「讓球主客和」「主勝」。
周中國際賽以友賽為主，球隊戰意成疑，未必打真軍，反而愛爾蘭主場對格魯吉亞，係世盃外；以愛爾蘭搵得意大利名牌教練查柏東尼執教，當然唔想分組賽就出局，同組有意大利呢支擂台躉，愛爾蘭對同組較低水準對手，更加不容失分。
陣容近年最完整
查柏東尼今次點名極具誠意，一眾英超主力悉數入選，當然少不了門將基雲同前鋒羅比堅尼；基雲轉投曼城，上仗對米堡即大顯身手，幫球隊贏波兼不失，今次由佢同近期為曼聯穩住後防嘅奧沙壓陣，相信可保不失。
羅比堅尼雖然回歸熱刺後，未能在打吡戰中攻破阿仙奴大門，但狀態有目共睹；羅比堅尼前線拍檔，亦有近期為雷丁經常建功嘅奇雲杜里等，而且杜夫呢位「傷患馬」亦常有入波，愛爾蘭今仗陣容，可謂近年最完整。
美國可贏墨西哥
格魯吉亞首輪對碰已經輸1:2畀愛爾蘭，今仗點兵都有部份外流主力，好似AC米蘭嘅卡拿迪斯、布力般嘅基辛尼舒維尼等。不過，格國本土聯賽2月初才重開，剛剛打完一輪聯賽，本土兵狀態肯定唔及打到火紅火綠嘅愛爾蘭兵；而且世盃外仍然用舊制，同分計得失球，愛爾蘭亦有大勝必要，信佢至少可贏兩粒。另外，中北美洲區外圍賽，個人對墨西哥教練艾歷臣冇好感，美國往績亦有優勢，取主W。
早飛王貼士
星期三20愛爾蘭vs格魯吉亞
首選：星期三20愛爾蘭勝[-1]（2）
次選：星期三20愛爾蘭[主/主]（1.95）
冷選：星期三20愛爾蘭勝3:0（8）
早飛倉
主菜：星期三20愛爾蘭勝[-1]（2）@1,500
渾水摸魚過關：星期三20愛爾蘭勝[-1]（2）x星期三28美國勝（2）2x1@500
今日早餐價錢：-$2,000
上日賺蝕：+$1,790
早飛倉結餘：$87,064
規則：$100,000本錢，每日買早報最多動用$5,000，最少$1,000，逢周二、五見報。
周中焦點
星期三2 日本vs澳洲
世界盃外圍賽亞洲區第1組大戰，雙方都極為重視，日本召回外流中場中村俊輔；澳洲亦有卡希爾、格拿等外流兵歸隊，大戰氣氛濃烈。
星期三23 法國vs阿根廷
「老馬」馬勒當拿帶領阿根廷第2仗，一眾愛將阿古路、美斯、馬斯真蘭奴及泰維斯等悉數入選，單看一對巴塞前鋒亨利大戰美斯，娛樂性豐富。