泛民主派即將喺稍後時間開記者會，交代對預算案嘅訴求。長毛噚日率先喺社民連黨團記者會上，講到明唔會出席，因為社民連非常不滿泛民只係諗住講訴求，唔肯將訴求同預算案最終投票立場掛鈎；即係就算鬍鬚曾當泛民意見係耳邊風，份預算案都唔會少得過23票，對政府一啲殺傷力都冇，仲開記者會嚟講咁多嘢做乜？
不過，長毛承諾如果泛民肯將投票取向同要求掛鈎，佢一定會現身支持。原來社民連都計劃提出動議，要求喺雷曼事件中監管不力嘅任總辭職，仲爭取緊修訂民主黨聽日提出、譴責政府押後政改嘅動議辯論，加入要求用過「狗噏」呢個粗俗詞語嘅煲呔引咎辭職。