本身係截取通訊及監察事務專員嘅胡國興大法官可能估唔到，做專員居然要受差人氣。胡官喺近日向行政長官呈交嘅周年報告中透露，有一次要求警方某人員澄清一啲嘢，對方居然表示不滿，話胡官要求佢做陳述，係剝奪咗佢用嚟保障公眾安全嘅寶貴工作時間，並指胡官身為專員，應信任佢同佢嘅同事，唔應該懷疑佢哋嘅專業水平同誠信喎。
嘩，咁仲得了，胡官嘅職責係要監察執法部門有冇濫用截取通訊嘅權力，好似亂勾人線或者用嚟監控社會呀咁。胡官惟有向呢位警務人員同警務處解釋佢嘅工作，好在一哥鄧竟成仲識大體，寫信畀胡官耍冧，話呢個人員嘅意見係錯誤同不當嘅，已經話咗佢。