曼聯上季就靠晒基斯坦奴朗拿度（C朗），但今季就唔同，除咗C朗，雲達沙、尼曼查維迪同傑斯等個個都好掂，其中傑斯連隻生銹右腳都識入波，唔怪得紅魔嘅奪標賠率熱到得番1.15倍，相反兩支前冠軍藍戰士同兵工廠，就冷到成20倍同埋200倍啦！
猛將輪流威傑斯右腳入波
前晚曼聯作客韋斯咸，憑35歲嘅傑斯喺62分鐘用佢隻生銹右腳入波贏1:0，聯賽8連勝之餘，仲第9次喺聯賽贏1:0，而雲達沙嘅連續不失時間亦增添至1,212分鐘，打破活士所保持嘅大不列顛門將不失球紀錄（86/87球季效力格流時連續1,196分鐘不失）。
曼聯領隊費格遜賽後笑住咁講：「喺我印象中，傑斯對上一次用右腳入波應該係12年前對高雲地利。」講到雲達沙，費格遜就咁話：「我哋𠵱家挑戰緊最長不失球紀錄，對球員嚟講無疑係動力，特別係雲達沙。」
曼聯贏咗韋斯咸後，以兩分反壓利物浦攞番「1哥」位，仲比排3、4、5位嘅車路士、維拉同阿仙奴，多成5分、7分同12分，冠軍賠率仲熱到得番1.15倍。不過費格遜就好謙咁話：「猶記得喺98年，我哋領先阿仙奴成11分，但最後輸咗個錦標，所以我哋唔應該淨係睇領先幾多分。」
車仔阿仙奴越踢越沉
其實費格遜都唔使咁謙，學韋斯咸領隊蘇拿話齋，紅魔可以話係世界最強。佢哋強在個個球員都掂，除咗王牌C朗，攞咗上個月英超最佳球員嘅尼曼查維迪，喺拍檔里奧費迪南受傷嘅時候一夫當關，雲達沙可以咁耐唔失波，佢都好有功勞。至於傑斯雖則唔係場場打，但落親場都有料到，唔怪得費Sir拍心口話一定同佢續約一年啦。
車仔同阿仙奴越踢越沉，利記水準唔穩，而維拉雖則殺緊上嚟，但實力始終差啲，40倍冠軍唔易開㗎！所以睇嚟今屆英超應該飛唔出曼聯五指山咯。
英超最新奪標賠率
曼聯：1.15倍
利物浦：5.5倍
阿士東維拉：40倍
車路士：20倍
阿仙奴：200倍
資料來源：足智彩 截至：09/02