元宵佳節最啱人月兩團圓，但係民主黨甘乃威就好博愛，請埋傳媒上佢屋企一齊度元宵，佢太座Candy更加唔話得，親手整咗湯圓、心形布甸同朱古力等等美食宴請傳媒，認真愛屋及烏。老婆咁善解人意，甘威自然要有啲表示，佢一早買咗盒心形朱古力送畀老婆做情人節禮物，𠱁得另一半非常開心。
大情人有禮物，小情人一樣有。各位唔好誤會甘威好似曾鈺成咁有第二春，佢嘅小情人其實係讀緊中三嘅囡囡，同媽咪一樣有盒朱古力。甘威同太太相識30年，今年大年初一係佢哋結婚23周年紀念。19歲時因為做義工而同太太撻着嘅甘威聲稱，太太一早飛唔出佢手指罅，睇唔出外表老實嘅佢居然自認係冧女殺手。