旁車司機乘客好奇探頭張望，路邊行人停步舉機……輕而易舉成為全街焦點嘅，是一部部外形趣致嘅古董車，55年沙灘「甲蟲」、「甲蟲」保時捷混種、58年開篷平治……時光倒流般，點會唔聚焦？你想問：「阿婆級，仲行得？」唔使質疑！車主們會話你知：「上廣州都得！」因為呢日馬拉松式巡遊，只係甲蟲車會5月廣州慈善之旅嘅前奏。
記者：黎頌詩
攝影：王文忠
玩車，尤其玩老爺車，從來都係男人玩意，開住自己嘅大玩具四處招搖，嗰種滿足感，大概男人最了解。「女人玩唔嚟㗎！」巡遊隊員Eagle話，我，女人，無唔順，仲絕對同意！想臭罵我嘅一眾烈女咪激動，先同我一齊起程啦。
比起以前參加嘅車隊活動，今次屬於「輕量級」，正式係悠悠閒、旨在Show靚樣，所以，參加者有老有嫩仲有BB，一啲都唔奇，甚至連行婚禮嘅新人都有一對，十足開心嘉年華。
「好Feel！」
巡遊車隊由馬鞍山出發，第一站往尖沙嘴，再經紅隧過灣仔，以遊艇會附近為終點，走勻港九新界。沿途最大享受係嚟自四面八方嘅注目禮加口哨聲，坐喺無遮無掩MINIMoke上嘅我，當然好得戚。不過一入鬧市，原來先係戲肉：喺佐敦一帶左右大巴士逼到實，然後係西九高層大廈地盤竟然高空淋水，「坐穩呀，衝過去啦！」身旁車主陳生號令。然後……濕晒，加笑聲。最震撼嘅係入紅隧！即時拉起衣帽掩鼻，不過陳生就望住我偷笑。出隧道無耐，有隊員拋錨！喺車龍中推車，大家一樣氣定神閒，推埋路邊手口並用即時修理，竟然又行得番！諗起5月中車隊會起程往廣州舉行為四川學校重建而籌款嘅車展，唔好意思都要問：「上廣州咪好辛苦？」陳生反問：「點會辛苦？」這時，後座攝影哥哥點起香煙，「嘩，你食煙定食塵？」佢答：「好Feel！」各位姊妹，明未？呢個就係男女之別！
明星級甲蟲
55年甲蟲沙灘車
全場最搶甲蟲，係Eagle23年前拍賣所得，賣相顏色夠省鏡，再加多個誇張尾翼，應該係全港唯一。佢魅力驚人：曾經喺路上有司機因為昅到實而分神撞車！
甲蟲保時捷混種
身上有齊保時捷血統嘅九件BodyKit，超巨型頭尾揼把加定風翼，軨冚有保時捷標誌，襯上甲蟲可愛外形，肯定搶收視。
70年現代化改裝甲蟲
最可愛嘅我揀JohnLee改裝版，車頭改成美國舊KitCar風格，最爆係仲有電動天窗！John最高峯時有128架收藏，狂迷！
搶鏡外援
今次巡遊嘅成員，除主力嘅各款古董甲蟲外，仲有其他古董外援幫手撐場，講到夠Cute夠搶鏡，都同甲蟲勢均力敵㗎！
陳先生×78年MINIMoke
「部車Keep得新淨靚仔，仲好跑得！」
盧家×70年SpitfireMK3
「佢買返嚟嗰陣好似得棚骨，要花好多錢同工夫執靚佢㗎。」
鍾先生×58年開篷平治
「呢部係SL嘅第一代，𠵱家好少啦。」
