旺旺董事長蔡衍明買入亞視三成股權，儼如亞視救命恩人，身為亞視非執董嘅陳永棋自然好開心，因為唔使見住亞視走向死亡，但噚日佢出席廠商會團拜時，就唔肯多講亞視嘅日後運作，可能係費事俾人話佢指指點點啦。反而傾到旺旺嘅零食，佢就好似賣廣告咁大讚旺旺真好味，仲話唔覺得好熱氣啫，仲堅稱呢番讚美說話同蔡老闆入股亞視無關喎。
廠商會6月殺入內地
講番廠商會，佢哋啱啱舉行完嘅工展會人丁兩旺，自然飲得杯落，除咗4月會喺葵涌舉辦食品嘉年華帶動另一消費熱潮，原來佢哋即將殺入內地，6月會喺深圳會議展覽中心首度舉行為期六日嘅「香港工展會暨深港品牌消費展」，希望吸引粵港兩地廠家參展，延續工展會盛況空前嘅輝煌成績。
廠商會今年10月換屆，前香港《基本法》委員會副主任黃保欣嘅細仔黃友嘉表明去馬，有意接替尹德勝做下任會長。噚日黃友嘉喺廠商會團拜中表明，積極研究參選問題，相信自己嘅叔伯兄弟都會幫自己拉票。唔少廠商會中人例如立法會代表林大輝以及肥棋都大讚呢位後起之秀，相信佢坐正機會好大。