噚日元宵佳節，但八方都冇mood去賞嗰個據講係52年來最大嘅元宵月。唔係冇人陪，只係呢排個個都話裁員、減薪，仲有乜心情？但有個中環friend話，呢個時勢最緊要有幽默感，好似社聯咁吖，今日喺會展搞咗個「商界展關懷」頒獎禮，電盈、滙豐等大公司都成為CaringCompany；至於班電盈員工同小股東，仲有滙豐職員、雷曼苦主，whocares?
裁員企業諷刺攞獎
據社聯方面解釋，呢個「商界展關懷」（CaringCompany）計劃，今年已經係第七屆，主要係鼓勵啲企業做多啲社會服務，好似捐錢、做義工、環保呀咁，今次有成1,765間機構獲得表揚，包括電盈、滙豐、中銀等香港主要企業，但獎項絕對同近排有關企業裁員、減薪之類嘅新聞無關，而且強調社會服務呢樣嘢，有做始終好過冇做。
話雖如此，呢頭電盈主席楷楷先俾小股東鬧shameful，班員工又擔心緊隨時被公司減薪裁員，嗰頭呢間公司仲可以喺我哋財政司司長曾俊華手上，大模廝樣咁接過獎項，大大隻字咁話自己係CaringCompany，真係好諷刺。或者對啲員工嚟講，公司係「關懷人哋，刻薄我哋」啦。
唔好話八方sarcastic，有位自稱係雷曼苦主兼電盈小股東嘅陳生亦打嚟同八方呻，話聽到呢個頒獎禮，真係火都嚟埋，因為得獎嘅公司唔係有份託管同賣迷債嘅一眾銀行，就係近期減薪、裁員嘅大企業，仲有加快減慢嘅油公司、同更改長者乘車優惠嘅港鐵等等，如果仲要由政府高層親手頒個獎畀佢哋，政府咪即係變相認同呢啲無良企業嘅行為。
呢位市民仲話，已經聯絡咗個別政黨，有政黨好有興趣，考慮今日晏晝去會展踩場，乘機請願示威。唔知社聯主席陳智思到時點接招，主禮嘉賓鬍鬚曾又點反應。
mailto:[email protected]