上周末河北省為畢業生搞嘅年度招聘活動開鑼，求職者超過10萬人，參加嘅企業超過1300間，提供近3萬個職位。咁嘅時勢睇落唔錯，原來要搵企業參加並唔容易，啲企業唔裁員都唔願請人，所以主辦單位惟有加多幾分力，打咗5萬幾個電話、寄出萬幾封信畀企業，先維持到咁嘅規模。
據人力市場員工話，大型鋼鐵企業包括邯鄲鋼鐵、唐山鋼鐵同首都鋼鐵等今年都冇參加；建築房產、外貿等行業提供嘅職位亦減少。反而醫藥業最多企業參加，唔通受金融海嘯打擊，搞到多咗人頭暈身㷫，所以要請多啲人手？
一家保健公司嘅招聘員話，𠵱家最缺推銷員，因為生意少咗，要開拓新市場增加銷路，所以銷售職位佔最多，有28%。以前啲大學畢業生唔多願做推銷，家陣都放低身段爭住做；其次係佔10%嘅IT類。