金融海嘯底下，無論咩階層都應學會做個精明消費者，曼聯球星朗尼同老婆高蓮（圖）就係好榜樣啦！最近兩公婆去食飯，埋單計數係27.8鎊（約318港元），朗尼連埋張半價優惠券畀服務員，結果13.9鎊就落到樓，搞到對方鬼咁開心，心諗：「原來球星同普通人冇分別！」高蓮之後仲畀咗5鎊tips。原來朗尼夫婦出生基層，保留普羅大眾「知慳識儉」嘅習慣，好似高蓮最近就講過：「我哋好幸運可以住靚屋，周圍度假，不過日常生活並唔奢侈。」朗尼朋友亦好支持佢呢種做法：「人人都想有折頭，佢既然有優惠券，點解唔用啫？」我求大俠覺得朗尼咁做，亦可能同領隊費格遜最近提醒球員，喺金融海嘯下要審慎消費有關；呢次費Sir知道朗尼咁聽話，肯定好開心啦！