面臨經濟衰退，小市民飯碗不保。突然間，諗起特首以前嘅參選口號：「我會做好呢份工！」真正落手落腳做當然唔易，倒不如玩吓《TalesOf》系列最新一集《光明神話2》嚟TuneUp自己，遊戲內除集合以往角色共50人之外，仲有十幾種職業俾你揀，有食腦型，亦有體力型，想劇情發展順利，最緊要學識點樣「上位」同「跳槽」，十足現實版職場求生，咁玩法會唔會導致精神壓力㗎！
記者：陳國輝
遊雙魚星開始
故事開始，主角喺一隻好似雙魚星號咁巨型嘅超級郵輪上Relax緊！咪發夢以為船裏面有得做Gym、落Disco或者焗桑拿咁爽，查實郵輪只係遊戲舞台，玩家任務係先組織優秀隊伍，再接Job去到不同嘅世界打怪獸，然後賺錢升職。當能力值不斷提升，郵輪設施（裝備）亦會擴張，即係話你玩得越叻，可Unlock嘅冒險世界就會越多。
揀職業要睇前景
《TalesOf》系列早已積落大班Fans，呢一集雖然叫做《光明神話2》，但其實與同系如《TalesOfHeart》或者《TalesOfPhantasia》等，故事劇情基本上唔一樣。這次特別將本系列31位角色加入到《光明2》，Crossover味道勁濃，Fans當然鍾意啦！但更重要係，玩家最好清楚知道每種職業嘅長處，以及「前途」係點，例如戰士屬於戰鬥系基本職業，只可單手裝備劍或斧頭，但不能使用魔法；至於高級別嘅聖騎士，唔單止可以雙手用劍，仲具備僧侶及大劍士能力，既可攻擊，又可使出補給魔法。簡單啲講，玩家喺遊戲開始嗰陣已經要選擇一項職業，至於主角嘅未來如何，就睇你喇！
邊攻邊守夠緊湊
除咗要小心選擇職業，亦因為遊戲採用多人作戰模式，玩家點樣將各成員嘅專長發揮出嚟，又係另一關鍵！進入戰鬥介面後，根據各人能力值不同，速度最快嗰位例牌可以先發制人。呢一集特別強化自由度及動作性兩方面，例如當劍士使出攻擊招式嗰陣，魔法師亦可同時使出補給魔法，為劍士回復生命值；另一方面，每種職業喺唔同級別時，亦擁有自家必殺技，畫面會播出一段精采動畫，雖然呢類玩法已經唔止一次，但勝在《光明2》採用嘅係「多面向線性動作戰鬥系統（FR-LMBS）」，節奏快速又緊張，唔似得一般RPG遊戲咁，逐位角色排隊出招咁悶！
首批送特典DVD
《TalesOf》系列向來以豪華特典包裝出晒名，今集都唔會例外！凡購買首批《TalesOfTheWorldRadiantMythology2》，隨Game會附送一張資料片DVD，裏面收錄咗有關本作嘅廣告、角色資料集以及特別版漫畫等。假如你係Fans的話，記得趁快買喇！
Profile
機種：PSP
類型：角色扮演
人數：1
發行：NAMCOBANDAIGamesInc.
版本：亞洲版
售價：$328（包括特典DVD）
i-Gamer（27253338）
