有大名撐住，自然可以招徠多啲生意，如果內地出名嘅大學畀埋個名你用，就更加發達。不過，華華睇《每日經濟新聞》報道，「清華紫光」同「北大方正」呢啲大學企業，要改名做「紫光股份」同「方正集團」，其他用咗大學名冠名嘅，都要改名。
原因係國家教育部發咗個「改名令」，要求呢啲大學企業取消冠名，除咗可以保護學校聲譽，同形成公平市場環境，最重要係避免部份學校或企業，用國家嘅資產嚟賺錢。另一方面，校級領導亦要喺年中前，由直屬學校辦嘅企業領導班子中全部撤出。
其實類似「校名＋企業名」嘅情況喺內地好普遍，好似以上海交通大學同四川大學冠名嘅公司，都超過10間，但唔少好似北大、清華同復旦呢啲大學，𠵱家都有品牌保護同知識產權嘅意識，佢哋為咗打擊校名同標誌被濫用，已經紛紛註冊做商標。邊個話搞學術嘅都活喺象牙塔！