金融海嘯之下，搵錢搵得太盡，隨時俾人鬧shameful，況且呢個世界「憎人富貴厭人貧」，所以唔少富豪都寧願低調啲。賭王何鴻燊就反其道而行，對於最近《福布斯》個富豪排行榜話佢身家縮水九成，佢噚日不但冷笑反擊，仲晒命咁話佢間賭場日日好似印銀紙咁，根本想窮都難。
反而要多謝《福布斯》
賭王噚日出席婦協新一屆理事就職兼春節聯歡，俾記者圍攻問佢係咪身家大縮水。賭王好牙擦咁話，對排行榜「一笑置之」，仲話佢身家有幾多，全世界冇人知，只有佢自己一個知。不過，佢話都要多謝《福布斯》喎，因為「日後有人叫我捐錢，我唔使捐咁多；嗰啲想綁票我嘅，唔使再諗嘞，因為我都冇錢。」
話就咁話，但賭王跟手又忍唔住寸嘴：「我間賭場，日日都好似印銀紙一樣。日日印銀紙，根本係冇法子窮㗎。」對於話佢舊年因為澳博上市，搞到身家蒸發，賭王就更加條氣唔順，自言佢副身家點只咁少，「澳博上市，我只係拎啲咁多出嚟，輸晒又點啫？」仲話佢啲錢主要擺喺澳門同外國，「唔好講話（澳博股價）由三蚊跌到個六吖，跌到一毫子都冇問題！」
過去多次獲賭王泵水嘅婦協噚日亦好識做，主席林貝聿嘉即場話賭王已應承出錢為婦協明年嘅春節大會包底。賭王其後仲發表以牛年為題嘅棟篤笑，話做生意呢樣嘢，最緊要老實，千祈唔好吹牛。賭王有冇吹牛，就要留番畀大家自己分析。
教女士煲牛鞭箍老公
賭王又分享個人經驗，話唔少女士同佢講，驚老公今年會行差踏錯。噚日單拖出席嘅賭王就話，一眾太太除咗可以好似牛皮膠咁黐實老公，得閒仲可以煲多啲牛鞭畀老公食，「咁佢哋就唔會喺15樓偷偷養隻牛牛，晚晚去飲牛奶啦。」講到呢家嘢，點可以唔信賭王先。
mailto:[email protected]