美國京奧8金泳手費斯吸大麻斷正後，美國網站《Radaonline》日前踢爆另一京奧風頭躉、牙買加田徑好手保特，喺邁亞密一夜店同跳舞女郎大跳「三級舞」，雖然冇犯法，不過形象就破產㗎啦！飛人，因住腳軟喎！
事發喺美國時間1月18日（周日）晚，間夜店叫《Bongos》，由美國古巴裔音樂人EmilioEstefan夫婦開設，日頭屬於古巴主體餐廳，夜晚11點至凌晨4點就變身的士高，成為當地名人蒲點。保特當晚放低「閃電俠」身份，變身黑夜之神出動，一身黑牛仔褲、黑上衣、黑超同黑鞋。
從圖片所見，呢位以破世績姿態盡攬京奧男子100米、200米及4x100米金牌嘅「閃電俠」好快曝光，以至店中索女排住隊要合照。初時保特仲好有風度，最多都係掂住對方香背啫！不過，隨住幾杯古巴酒落肚，同埋DJ將拉丁音樂捽到起晒煙，終於誘發佢驚人嘅爆炸力！
一人玩晒接力賽
「如果有『三級舞』項目，保特肯定得金牌！」德國《圖片報》咁樣形容保特嘅表現，我求大俠就話佢當晚仲係接力冠軍㖭！保特將第一棒交畀藍裙少女，將對方壓倒在地，十足章子怡同男友沙灘纏綿咁款。第2棒係一位灰衣少女，保特將對方屁股貼向下體；第3棒係身材臃腫嘅白人少女，同樣係將下體緊貼對方臀部；第4棒就不得了啦！佢竟然將一白衫少女雙腿分開……我求大俠都唔好意思講落去啦！
我求大俠洗完眼後，忽然覺得保特咁做又冇犯法，最多係意識三級，令人想入非非，好過吸大麻嘅費斯好多。不過，作為運動界新偶像，希望呢班後輩學似米高佐敦、劉易斯咁檢點啲，佢哋畢竟係好多細路仔嘅偶像嘛！