噚日渣打馬拉松，好多名人、藝人都嚟湊熱鬧。呢項城中盛事，大家都知道分別有十公里、半馬同全馬三項賽事，但原來今年新增一項兩公里嘅「領袖盃」，由灣仔運動場跑去維園，邀請啲城中名人同「各界領袖」參加，有羅康瑞、陳智思、醫管局蘇利民等等，由灣仔運動場跑去維園。
陳智思平時愛運動，跑得唔錯，估計自己係一眾老外以外跑得較快嘅華人。有人恭喜羅康瑞新婚愉快，但就唔見朱玲玲嚟打氣。
此外，特首打落一眾特區大小官員噚日亦有嚟。保安局局長李少光主持完頒獎禮，就俾記者追問消防處考核報告網上外洩事件。李局長話，呢啲咁嘅事一單都嫌多，對於同類事件一再出現，佢覺得好遺憾，強調會全方位調查喎。