好多人都覺得金融界嘅人開口埋口講錢，太市儈，冇人情味。敏妮當然亦唔例外，經常俾身邊好友話做人太過mean，事事都要求實際。
單睇敏妮仍未嫁得出，睇怕都唔可以唔承認，同自己做嘢太mean有關，但講到市儈，冇人情味，敏妮就唔係咁認同。
做到經濟獨立其實係一種對人對己負責嘅表現，經濟獨立唔使向人求助，避免成為人哋嘅負累，仲可以幫有需要嘅人。
預留資產易轉身
其實，無啦啦講呢個問題，都係因為近期分別同幾個朋友敍舊，聽到佢哋嘅經歷，有感而發。
其中有位做生意嘅朋友，典型中產，太太唔做嘢專心湊仔，但金融海嘯對佢生意影響好大，公司要炒咗個秘書，叫太太出嚟幫手，屋企亦連工人都炒埋，叫爸爸媽媽一齊嚟同住，幫手湊仔之餘，買畀爸爸媽媽層樓可以出租幫補吓收入。佢慶幸自己冇做啲大風險嘅投資，兼總算有番啲資產，積穀防饑，喺呢段時期總算有得轉身，唔使逼埋死角。
其實所謂理財，除咗係點樣賺錢達到目標，更重要係盡量避免令自己處身喺財困嘅危機中。就好似做生意咁，正常情況下，達到收支平衡之餘最好有盈利做盈餘。
個人理財上亦要做到日常收入可以支持日常支出。好似朋友咁，就係因為以往有「盈餘」，所以海嘯逼埋嚟都仲可以轉身。
越有錢底線越高
老套啲講，錢唔係萬能，但冇咗錢真係萬萬不能，當然為五斗米折腰好冇台型，每個人都應該有條底線，但有一點要承認，越有錢，條底線就可以越放得高。
溫敏妮
http://wanmanli.com/blogs/