伊能靜舊年同台灣藝人黃維德拖手遊北京，搞到佢同庾澄慶（哈林）嘅婚姻現危機，仲有傳哈林媽叫個仔「休妻」。農曆新年間曾傳出佢哋兩公婆帶埋囝囝小哈利去北海道箍煲。
伊能靜日前終於返台灣，但據知唔係同哈林復合，而係搬出庾家。有消息指哈林聽日錄影台灣綜藝節目《百萬大歌星》，可能會發表離婚聲明，結束8年婚姻。
馮仁昭收到風，話伊能靜呢幾日搵朋友去庾家執嘢走。有指哈林媽嬲到大鬧：「叫這個女的以後不要再進這個門！」噚日朝早11點幾，冇化妝嘅伊能靜現身桃園機場，又飛返北京。當時佢拖住好多行李，拉低頂帽費事俾人認到，仲猛傳手機短訊。冇幾耐伊能靜發現有記者，嚇到即刻推行李車閃人，可惜失手撞牆。當記者問佢覺得自己有冇做錯時，伊能靜猶豫咗兩秒，之後垂低頭入閘。
哈林公園湊仔
伊能靜一走，哈林就做番帶子洪郎，噚日下晝兩點幾，佢同囝囝去咗公園玩，又玩單槓又爬樹，似乎冇受婚變事件影響，不過記者行埋去同哈林傾偈，佢即黑面話：「我不接受訪問！」