港澳辦大前日公佈《香港澳門記者在內地採訪辦法》，規定港澳記者到內地採訪前，要先向中聯辦攞採訪證。呢項措施引起香港新聞界強烈反彈，擔心內地藉此限制採訪自由，尤其今年係中國政治敏感年。「夫子」劉銳紹噚日話，據聞港澳辦內部對新規定有過一番爭論，但相信要過咗今年，先有望出現轉機。
雖然港澳辦話，呢項即日生效嘅新規定唔係想阻香港記者採訪，但有報紙行家上星期六向中聯辦申請採訪證，對方竟然話未有申請表格。
難採訪突發事故
商台新聞總監May姐噚日亦喺節目度，質疑港澳辦咁搞法，日後如果發生好似四川大地震或礦難咁嘅突發事故，記者想即時去內地採訪都好難，要等中聯辦開工先可以去申請證件，搞得嚟採訪都冇晒時效性啦。May姐又話，覺得港澳辦今次根本唔係想方便記者採訪，做法同國家開放嘅形象好唔脗合。
劉銳紹就話，據聞港澳辦內部對新規定有過一番爭論，奈何有大人物對此一錘定音，相信要過咗09年先可能有轉機。八方就悲觀啲，相信可能要等中國再搞奧運，香港記者先有可能自由啲咁返內地採訪。