中文大學新亞書院建校於一九四九年，今年就係六十周年鑽禧，新春伊始，展開一系列學術講座及慶祝活動，至到今年十一月二十九日星期日在會展中心舉行盛大晚宴之後，先至結束慶祝活動。消息一出，已有不同學系，不同年份畢業嘅校友各自預訂一席先。點解要到十一月尾呢，因為要恭候第一屆畢業生（一九五二年文史系）余英時教授回港，配合二○○九年大學畢業禮（十二月第一個星期四），屆時余教授並會公開演講。
有最重量級嘅余英時教授壓軸，另外有邊位猛人主持第一炮呢？誇啦啦，新亞另有一位重量級校友徐立之教授（現港大校長），徐校友（一九七二年生物）係遺傳基因權威，余教授係當今中國文史專家學者、著名權威，已經自普林斯頓大學退休，素享盛名，而徐教授在遺傳基因研究方面，亦係世界知名。徐教授、校長、校友會喺二月二十日星期五下午五時半在中文大學逸夫堂公開演講，就係「新亞．基因」，題目十分吸引，但亦神秘，究竟徐校友想講新亞嘅基因吖，還是新亞與基因呢？兩者有何關係呀？徐校長在農圃道舊新亞校舍讀書四年，在沙田中大校園讀碩士兩年，先至去美國讀博士及在加拿大教書，直至二○○二年回港做香港大學校長。可以講，徐校長之學術基礎在中大，而在美國及加拿大發光發熱，返港就貢獻畀香港大學與香港社會，可以講得係香港之驕傲，母語教學之極成功樣辦，因為佢係巴富街中學（今何文田官立）嘅畢業生也，徐校長自少就知道「英文書、中文教」係乜嘢一回事，與港大及英中產品孫明揚、黃鴻超唔一樣。
徐立之講基因，左丁山希望聽得懂，一定如時到場，洗耳恭聽，相信中大逸夫堂到時會坐滿學生，譬如中大生物系、生化系嘅學生，會排排坐聽大師兄「講道」！左丁山喺中學讀文科，會考理科只考生物一科，居然攞個D，而自以為可以攞A嘅經公科就幾乎肥佬，只係得個E，但入到大學，就主修經濟，對理科自此不聞不問，係正式科學盲，但係睇CSI片集，人哋測試基因，易如反掌，覺得好神奇，二月二十日希望可以請教徐教授。