剛過去的叱咤頒獎禮，方大同勇奪男歌手之時，一眾903DJ有意無意走下台「嘲弄」大同身旁的薛凱琪，令她頓時又喊又笑。一個月後的今天，兩個人依然《甜蜜蜜》，Khalil承諾繼續為Fiona《SingalongSong》，這對緋聞男女不避嫌大叫：「我愛你！」相愛又不會談情，相信只有他倆才可維繫如此獨特的感情。
記者：蒙為亮
攝影：林栢鈞
鳴謝：VanGogh
髮型：JoLam@VIAILCOLPO
化妝：Jessicachan
方大同（Khalil）
於美國夏威夷出生，先後於上海和廣州生活，於98年定居香港。05年11月發表首張個人專輯《SoulBoy》，08年4月已能夠於台北舉行《方大同未來LIVEConcert》。今年1月1日，他更於叱咤樂壇頒獎典禮上奪得「叱咤樂壇男歌手金獎」。
薛凱琪（Fiona）
04年出道，第一張專輯《FDebut》在一星期內已達金唱片成績，其後在IFPI香港唱片銷量大獎中獲「最暢銷本地女新人」的殊榮。近幾年不斷在歌、影、視三棲發展，上年更踏上台板演舞台劇。最新派台歌《甜蜜蜜》火速奪得多個電台流行榜冠軍。
他與她的10首至冧愛歌
1.留意歌詞之作—《Let'sStayTogether》 ALGreen
2.格林美情歌王—《Ordinarypeople》 JohnLegend
3.調子輕快之作—《MyFunnyValentine》 ChetBaker
4.Soul浪漫之選—《Unforgettable》 NatKingCole
5.意境浪漫之選—《純情》 王菲
6.一個人的浪漫—《寂寞的男人》 張學友
7.睡前冧歌—《GoodnightMyLove》JessieBelvin
8.不只是朋友—《You'vegotafriend》 CaroleKing
9.今年情人節主題曲—《甜蜜蜜》薛凱琪
10.LoveSong的第二部曲—《SingalongSong》 方大同
不怕悶越做越愛
作為一個情歌王創作人，Khalil出道不夠四年，一年一唱片，而且還要欠下很多歌手的歌債，口頭上只有三個字：「還不清！」但對Fiona卻是一首又一首的度身訂做之作，由甜到漏的《糖不甩》到新歌《甜蜜蜜》都能成大熱之作，說穿了，是偏心？
薛凱琪=薛
方大同=方
小記=記
方：偏心一定會，不過其實每一次作歌之前Fiona都會同我講一句：「幫我作一首適合我薛凱琪嘅歌啦！」可能因為咁，所以不知不覺間就變得好似專為佢寫一樣。
薛：其他歌手都係咁講㗎啦！有咩分別呀？
方：都唔係㗎，好多歌手叫我寫歌，都會話可唔可以寫一首好soul、好有方大同味道嘅歌？其實隻歌係我寫，本身已經有我嘅元素，只係唔同人唱會唱出唔同風味咁解。
薛：咁我有咩特色？
方：你啊？熱情、好sweet，但係真正認識你嘅人又會知你有好多想法，雖然你係鬼妹仔性格，但係我偏偏覺得中國小調最適合你，有一種不足為外人道嘅詩情畫意，再加上Wyman嘅詞，每一次都計算得好準確。
薛：真係要好多謝Khalil同Wyman，因為佢哋好錫我，好似《甜蜜蜜》呢隻歌，做了舞台劇Themesong，又估唔到台灣有咁多人用嚟做Ringtone，你諗吓，廣東歌喎！
方：呢兩年你真係大個咗好多。
薛：我都覺，上年我用咗一年時間出咗兩張唱片，做咗六場舞台劇，我覺得好幸福，因為舞台劇一定難賺大錢，但公司仍體諒我去任意妄為。嘗試做舞台劇，令我用咗好多時間同精力去排練，因鍛煉而變得成熟。最開心都係啲記者都開始唔寫我啲緋聞，我諗呢啲係一種肯定。
方：睇完你個舞台劇，第一個感覺就係你開始真真正正成為一個演得又唱得嘅Artist。我覺得做Artist一定要LoveRepeat，唔係叫你CopyCat自己，只係好似作歌咁，要持之以恒作十年就會越作越好，呢啲就叫LoveRepeat，同一齣舞台劇做十次，你都依然堅守就會接近成功。
薛：我知，好似你作一隻歌，會唱幾千次Demo、錄幾十次音，方大同就係一個咁有恒心又唔怕悶嘅人，唔怕悶，越做越愛，都係因為真心鍾意！
發爛gag夢
普通朋友互傳sms本是平常事，但訪問中Fiona同Khalil竟大爆雖然不是情侶，但煲電話粥的次數多於常人，更試過煲粥煲通宵，莫非緋聞中電話傳情真有其事？聽聞他們更會搞嘢搞成晚……搞咩？搞爛gag呀，仲話想搞到做生意。
薛：方大同最鍾意搞gag，一開始識佢時以為佢斯斯文文，點知滿口爛gag，成件事錯晒！
方：你都有搞啊，唔好剩係話我一個，你個啲仲爛啦！
薛：記得有一次我哋通宵作咗個英文gag，𠵱家仲喺部電話度，因為文法唔同，所以香港人未必識笑，如果你識英文你就會覺得好無聊，真係好爛……
方：Tabledunworkkeepitreal.Chairdunflyforsure,understand?Man!
薛+方：（大笑）哈哈，都話你哋唔明㗎啦！只有我哋兩個先知道呢個笑話講啲咩。
方：其實解雀仔係會喺天上面飛，而魚係會游水一樣！我哋仲有好多，你仲聽唔聽？
記：嘩！好「黎明」……好難明啊！
方：其實爛唔爛有咩所謂，自己開心就OK，不過都有諗過遲啲設計爛gagSloganTee，最好可以發展成一門生意！咁就發喇！
薛：發就係發，不過係發開口夢！
方：唔好笑囉！
薛：講返轉頭，其實所謂傾通宵，大部份時間都係Khalil聽我訴苦，有時工作唔順利、有啲嘢做得唔好，佢都會畀我好大支持，同埋佢係「分析王」，所以聽完佢講都差唔多天光，佢對我真係好好。
方：我都好怕收到佢嘅電話，因為知道次次都要傾好耐，不過見佢咁慘咪安慰吓佢，但過程都係開心嘅！
冷靜與熱情之間
在訪問中自嘲是一個木訥怕醜仔，有趣的是他的內心卻像出生地夏威夷般熱；反之成日儍笑的Fiona，表面熱情如一般鬼妹仔的性格，內裏確是多愁善感。Fiona更即場示範飄淚技巧，一副我見猶憐的樣子，令到眾人當下不知如何是好。
方：其實我唔係扮cool，只係少嘢講，我由細到大都唔係一個熱情嘅人，但我係好感性嘅人。試過有次返上海見到一個好靚嘅日落，就立即諗起今次新Album個名「明明日落」；有時見到一個好耐無見嘅朋友都會有靈感，好少事都好易觸動我嘅情感。雖然拍拖唔多，但係就好鍾意寫情歌。
薛：我同你嘅性格啱啱相反，我好熱情，好鍾意浪漫嘅感覺，最衰唔識寫歌，所以通常都係用最簡單嘅方法製造浪漫。記得試過同以前男友搵張A4紙寫寫畫畫，佢唔識畫就畫火柴人，我就寫咗啲英文情話，好簡單而幾乎零成本，但係過程就好warm好sweet！有時浪漫唔可以太刻意營造，越造作反而越失真，你哋啲男仔唔好以為我哋啲女仔儍，其實女人嘅感覺真係好準。
方：我都覺得快樂同浪漫都唔需要用錢買，我攬住對方聽一首最簡單嘅lovesong已經可以好touching。
薛：無錯，其實最簡單嘅方法就係最感動人，由其係歌詞……
方：哈哈，你唔係又講《十年後的你》，你唔好啊！
薛：（熱淚盈眶）真係……
方：你哋知唔知一講呢首歌，佢實喊！
薛：……（兩行淚水直流）呢一首歌真係好感動，雖然唔係plugsong，不過啲歌詞寫得太好，好似令你反問自己呢十年來所做嘅事，你無悔嗎？呢十年一切做過嘅都會好似影相咁喺個腦入面反覆出現，有時真係感覺好孤獨，其實做Artist真係好辛苦……
方：唔使驚，有我嘛，哈哈……
後記
訪問就是這樣在眼淚和笑聲中結束，只能說愛不能談情實在太貼切他倆的關係，不是戀人，卻很愛對方。訪問中記者最後問了一句：你倆互相愛對方嗎？他倆笑了笑，點點頭，講了一句：我愛你。愛得很簡單，而薛凱琪更認為方大同是世界上最懂愛的人。《愛愛愛》、《如果愛》、《LoveSong》、《愛我吧》、《愛在》所有的歌名都飽滿愛，歌詞更不在話下，不是戀人，但卻可以愛得浪漫，所有感情也是相向的，有如打乒乓球有來有往，今個情人節你有對手嗎？