韓國女星嚴正花夥拍金來沅嘅新片《仁寺洞醜聞》前晚喺韓國全羅北道舉行記者會，化咗濃妝嘅花姐話首次做反派起初有啲擔心，最難係要佢掌摑男對手，事關每次都要NG，佢笑笑口話：「可惜冇金來沅份呢！」金來沅話最難捱係喺寒冷天氣下好多外景，既要攀山又要涉水。金來沅完成呢部戲嘅宣傳後，就準備喺下半年當兵，同fans暫別，咁fans咪要畀面捧場？