今個星期碟場好淡，新返DVD及Blu-ray都選擇唔多，當中甚至大部份都係美版Blu-ray，對戲迷嚟講吸引力唔大。選擇不多下，揀中徐克呢套《女人不壞》，估唔到睇完有唔少驚喜。一套發生在北京，關於愛情、女性為題材喜劇，雖然有啲胡鬧，但亦不乏趣味，120分鐘電影內睇到三位女性、三種不同愛情路，加上獨特包裝演繹，好似睇緊部真人卡通一樣。
記者：許福合
故事有條不紊
《女人不壞》係三個女人、三個故事，第一個泛泛（周迅飾），長相平凡，外加一個平實眼鏡，雖然外形麻麻，但利用醫生對人體了解，加上敢作敢為兼瘋狂精神，竟被佢創造出控制男性方法！
第二個女人係女強人唐露（張雨綺飾），一向利用自己優勝外表，在事業上無往而不利，男人對佢嚟講只係工具，誰知竟被她遇上絕緣體方中信，最後求愛更被拒絕。
第三個女人係樂團主唱兼拳擊手鐵菱（桂綸鎂飾），整天活在幻想之中，幻想擁有完美男友，一直幻想與明星X交往，直至遇上X的真人，她反而猶豫了。三個故事平行而又交叉發展，有條不紊，徐克導演為觀眾帶來了不少驚喜。
缺少內心戲
故事發生在北京老城，不過今時不同往日，電影中北京具動感時尚，建築美輪美奐，加上徐克在電影中滲入幻想元素，畫面極具都巿氣息。此外三個故事中女角，皆用上近似漫畫、卡通演繹方式，感覺相當有特色。可惜嘅係描寫三位女角時，可能要照顧到喜劇成份，總覺得缺少內心方面描寫，其實劇本有一定深度，向這方面深入可能亦係個不錯試點，不過《女人不壞》定位成喜劇，總不能要求太高了。三位女角中，個人最喜歡唐露呢個女強人角色，性格鮮明突出，故事發展亦明顯以她做重心，周迅造型奇特，亦令人留有印象，桂綸鎂則被劇本規限了。
查詢：DVDPro（23326326）