官恩娜（Ella）昨日在尖沙嘴出席港台舉辦的《老土正傳》首映及講座，曾拍過無綫劇集的Ella，提到近日的鹹豬手事件，她爆響口指一名女藝員曾被一名男藝員借醉意圖侵犯，她說：「我唔可以講邊個，但係嗰個女藝員同我講，當日出trip拍戲，做完嘢大家去一個娛樂場所玩，嗰個男藝員飲醉，走埋一邊夾硬㩒低個女藝員，係咁摸勻全身，想進一步侵犯。第二日個女仔同我講，嗰個人離晒譜。」
入行多年已結婚
問Ella是否知道該男藝員是誰時，她說：「唔講得㗎！我只知佢結咗婚，嗰個人好多人都識，入行耐過我。我只係想講，有時啲男仔以為自己比較英俊，但唔可以覺得個個女仔都咁隨便，唔好以為個女仔唔夠你紅就可以咁。」據知Ella拍過的劇集中，只有《酒店風雲》在外地拍攝。
馬德鐘、姜大偉、郭政鴻、吳卓羲和蔡子健等，均有份參演《酒店風雲》，其中已婚的馬德鐘昨日在將軍澳電視廣播城開工，被問到官恩娜所述事件時，他說：「冇原告案件做一啲娛樂新聞出嚟，有原告先有被告㗎，如果有人真係有投訴就企出嚟去處理，有乜嘢當事人自己企出嚟講。」吳卓羲昨日則說：「冇聽過呢件事，佢係咪親眼見到先？咁多年𠵱家先講？當時唔講？佢應該叫當事人直接出嚟講，因為咁樣會影響好多藝人聲譽。」
有份參演《酒》劇的女演員姚子羚昨日在電話中表示當時與官恩娜同房，承認拍完劇後經常與大班工作人員吃飯，但強調自己並非哭訴者，她說：「如果女事主𠵱家都仍然覺得唔開心，我都鼓勵佢出嚟講，因為我唔係當事人，唔想講太多。」與姚子羚在劇中有不少戲的郭政鴻則在電話中說：「嘩，成5年前嘅事，同邊個合作都唔記得，不過有冇咁狼呀？我當時冇聽聞過，唔回應囉，咁對人好唔公平。」
無綫總經理陳志雲昨日呼籲受害女藝人挺身出來指證，否則若只是聽聞傳言或沒有真憑實據的話，便不應發表言論，對其他男藝人造成不必要困擾，似在暗寸官恩娜。
採訪、攝影：卓寶花、王連連、葉雪
資料庫：性騷擾醜聞襲娛圈
無綫和亞視電視台近日紛紛傳出性騷擾事件，當中以魔術鹹豬手事件最轟動，由於原告被告從缺，令多位小生花旦被捲入風波。
鹹豬手抽女星水
苑瓊丹早前在電台大爆有男藝人喜以魔術冧女，並以高明手法非禮女藝員，郭羨妮、陳芷菁、陳敏之、楊思琦及楊怡等被傳是受害者，多位男藝人也被捲入風波中。無綫總經理陳志雲表示若有原告指證，將交由警方處理。
亞視職員性騷擾
今年初亞視三名任職人力資源及行政部的女職員報案求助，稱自去年10月以來，不斷遭一名男高層言語上性騷擾。亞視執行主席張永霖親自徹查，暗示有人利用事件搞內部鬥爭。
王維基口舌招尤
王維基去年底任職亞視行政總裁的12日期間，曾面見應屆候選亞姐，當眾質疑袁小曼的胸部真偽，當亞軍顏子菲表示有進步空間時，更反問對方：「乜嘢進步空間呀？個波大啲呀？」最後王維基就此事致歉，自言是「用錯字眼」的「無心之失」。
資料來源：《蘋果》資料室