股市升完又跌幾日，近日懶係再升番幾百點收市，成日喺度𠱁班小股民。唔該呢個擾人清夢嘅海嘯快啲過去，等大家唔使日日捱窮。一向唔買六合彩嘅畢傑當然專攻波仔，希望今期推介中番多少，斬大嚿叉燒！
博洛尼亞上周輸1:3畀費倫天拿，確實輸得幾肉酸，第1球梅度高難度快射，冇計；第2球梅度突破越位搞掂，輸防線佈局。博洛尼亞兩球輸得咁早，整定追唔番。不過今晚唔同喎，作客防線一團糟嘅烏甸尼斯（近10場聯賽失25球），就肯定有力一拼；唔好唔記得烏軍有射手加利亞雷拉停賽，想扒冷嘅波友，4.15倍W有得諗。
配腳就玩吓波膽，首選要維拉利爾贏紐文西亞3:0，次選4:0。「黃色潛艇」今周有中場般奴蘇利安奴停賽復出，令佢哋能夠「夫添」；客軍紐文西亞聯賽作客11場輸足10場，又有艾斯亞哥利亞及拿哥利兩位中前場主力停賽，火力大減。唔失球為今場宗旨，3:0啱啱好，有9.5倍合理。
葡超大戰揀波圖「主勝」
最後揀埋葡超榜首大戰，大膽咁要波圖主場淨勝賓菲加兩球，開[-1]嘅3.35倍「主勝」。之前睇番賓菲加上場聯賽對里奧艾維嘅重播，發覺班波攻力好有問題；雷恩斯冇晒料到，前面嘅文圖拉斯又平庸到不得了，波圖贏到兩球唔太意外㗎！不過呢啲大戰好興半場和波，補4.3倍「和/主」。
文：畢傑