電盈私有化辣㷫部份小股東，矛頭直指小小超，好多人透過電台烽煙節目發洩怨氣，八方聽聞有人對此十分勞氣，因為佢認為私有化間公司，係畀個機會小股東套現，況且買起間公司，同時要孭起債務，並非無本生利咁着數，咁都要俾人鬧，可怒也！小道消息稱，有人一度擬採取法律行動，之後當然冇下文，事關𠵱家風頭火勢，火上加油無疑引火自焚。
拆骨唔容易
私有化係咪搵小股東笨，八方相信大家心中有數，外界估計電盈私有化後可能被拆骨，了解情況人士卻指冇咁易，因為北京唔想香港嘅電訊公司落入外人手中，網通亦唔會買起成間公司，俗語話齋俾你𠱁到一次係我蠢，仲有第二次？因此估計小小超要繼續「守業」好一段時間。
至於富通保險經紀聲稱獲分電盈股票「種票」疑雲，由於袁天凡係富通前身盈科保險主席，故此都被拉埋落水。有消息指袁天凡都好唔happy，因為佢已經全退，燒到佢嗰叠好無奈咁話。正所謂出得嚟行，預咗要還，等執法機構查清查楚，自然清者自清啦。