日前無綫電視收費頻道娛樂新聞台有一名助理編導和一名幕後外判員工涉嫌一宗企圖強姦案，受害人是一名女舞蹈員，案件目前正在調查，娛樂新聞台極度重視今次事件，現任節目主持范振鋒大爆女藝員曾遭幕後人員性騷擾，並認為犯事人應重判，殺一儆百。至於女主播宋熙年及張允芝均認為女仔要懂自保，不要亂飲醉酒。
無綫繼早前鹹豬手事件後，收費頻道方面的娛樂新聞台又有一名助導和一名幕後外判員工涉嫌一宗企圖強姦女舞蹈員案，令人覺得世風日下，在無綫收費台主持節目《范後感》的范振鋒，昨日在電話中表示曾聽聞有些幕後人員性騷擾女藝員，有時借故相扶對方，其實乘機揩油，不過大多只私下向朋友訴苦，變成茶餘飯後話題，未有公開事情始末。
張允芝曾獲邀派對
范振鋒說：「做女仔嘅最好唔好飲醉酒，除非係好熟嘅朋友，同啲陌生人一齊就要小心啲。如果真係有人做過呢啲事，一定要重判，免得日後再有人受傷害，而且可以當警惕，阻嚇想咁樣做嘅人。」
07年國際中華小姐冠軍宋熙年也於無綫娛樂新聞台當主播，她昨日透過電話獲悉事件後說：「我唔知呢件事，不過以我所知有時工作人員收工後都會一齊食飯唱K，但因為我住將軍澳，所以冇出去，我唔會因為今次件事對同事有避忌，但就呼籲啲女仔要小心，要飲酒最好搵番女性或自己好朋友陪伴。」另一位女主播張允芝曾因採訪劉鑾雄時不慎用咪撞到他而被罵，昨日她接受電話訪問時說：「我唔係好清楚件事，做女仔要識保護自己，有時都有同事約去吓party，不過自己要醒目啲，去陌生地方唔好飲太多酒。」
嘉穎：估唔到咁狼
鄭嘉穎、陳自瑤及陳茵媺昨日到慈雲山中心出席活動時也提到這宗醜聞，鄭嘉穎說：「估唔到咁狼，PA（助導）呢個職位好慘，人工少做嘢多，但係做呢啲嘢都唔可以接受，係真就要坐監，係自己攞嚟。女仔話nomeansno，呢排新聞都可以警惕大家要尊重女性。」陳茵媺和陳自瑤均表示很少夜蒲和飲酒，陳自瑤說：「就算係出夜街，都係同好熟朋友嘅出去，我唔會同唔識嘅人玩。」陳茵媺贊成無綫將設立監察小組，她說：「可以阻止有乜嘢事發生，有事可以舉報。」另外，同是舞蹈藝員出身的吳卓羲則表示不認識涉案的舞蹈員及助導。
此外，Stephy（鄧麗欣）昨日透過電話訪問表示感覺電視台環境和氣氛都很差，對女藝員來說，真的要小心提防。方力申則覺得男藝人較女藝人好彩，不會太易蝕底，不過當與女藝人工作有身體接觸，就要特別小心，以免引起誤會，並呼籲大家要自律，互相尊重，電視台都要正視問題。
採訪、攝影：楊潔雯、卓寶花、丁寧
