歌神張學友早前透露因雷曼爆煲而損失慘重，早已唔使撈的他因而復出密密開工，除了為卡通配音和接拍新戲外，昨日又為影碟《學友光年世界巡迴演唱會》舉行五年來首個簽唱會。當記者問他會否考慮和太太羅美薇再生BB，他即耍手擰頭，並謂早已收爐。
張學友早前因投資雷曼債券而損手，雖未正式宣佈全面復出，但工作已一浪接一浪。繼早前為賀歲卡通配音，又宣佈與湯唯合作拍攝電影《月滿軒尼詩》，已甚少宣傳唱片的他昨日又在屯門為演唱會影碟舉行五年來首個簽名會，吸引大班fans排隊。
大會安排兩個小朋友以學友演唱會中的造型出場，司儀笑指他們是學友的未來女婿，之後又安排兩人送上金元寶，學友見狀即自嘲說：「你兩個都搬唔起嘅話先幫到手喎，係咪扶貧呀你哋？」
慶祝結婚13年
下周末是情人節，本月15日更是學友和太太羅美薇結婚13周年紀念，他說：「13年咯，年年我都會送禮物，今年真係未諗到，舊年送咗意大利陳醋畀老婆，因為佢鍾意用嚟點麵包食。」問到太太可會送他禮物，學友笑說：「佢冇嘢送畀我㗎。」記者笑問會否送多個BB給老婆，他笑說：「送多個BB畀佢？佢送畀我就差唔多，唔使諗喇，我哋收咗爐喇，我屬牛㗎，多數唔會生喇。」
岸西爆片酬低
提到演唱會影碟的首批定單已逾4萬張，有工作人員更笑言是「救命碟」，學友說：「多謝買咗嘅朋友，我都買咗100隻送畀工作人員同朋友，隻碟係好值得收藏嘅回憶。」
另外，學友即將演出岸西新片《月滿軒尼詩》，前日岸西到上海宣傳電影《親密》時大爆學友的片酬不及劉德華和梁朝偉，價錢和當年他拍《男人四十》一樣。岸西又讚湯唯可愛，相處幾天感覺很好。
採訪：藍文浩
攝影：黃偉雄
