大埔林村今年有棵膠製許願樹俾人掟寶牒，農曆年期間市民蜂擁而至許願，立法會議員張學明話人流大增，令附近一帶交通擠塞，係近年罕見情況，佢同八方講，林村許願樹廣場仲有新設施，包括許願塔、各地許願習俗展覽館同陶瓷展覽廳，最快虎年（即下年）有得睇。
區議員陳灶良話，新嘅膠製許願樹好受歡迎，美中不足係有人認為太難將寶牒掟上樹，佢話考慮過改善設計，但太易掟上樹又怕市民覺得唔夠挑戰性所以作罷，為滿足市民許願意欲，日後會增建一個許願塔，掟寶牒會易啲，又會改善寶牒設計，唔鍾意掟寶牒，則可將願望掛在許願徑兩旁，總之滿足晒市民許願嘅願望。