財爺鬍鬚曾噚日同市民玩互動，喺將軍澳一個商場出席預算案論壇，論壇由無綫新聞部主辦，主播許方輝做主持，廣告時段財爺同主持人私下吹水，點知唔記得熄咪，俾記者聽到。話說主持人叫鬍鬚曾估吓有冇市民追問佢電盈私有化問題，鬍鬚曾好肯定咁話：「我諗一定會。」但事後證實冇人問佢，不過佢都好老實，私下話無話可說。
之後主持人話證監會可能唔夠人手調查，鬍鬚就話：「如果佢哋唔夠人，我哋個office仲點夠人去做呀？」又指警方暫時可能唔需要介入，「你唔能夠一講，就話人哋（電盈）係有罪。」鬍鬚曾出席論壇後，同下屬去商場一間餐廳醫肚，繼續消費刺激經濟。